紅酒商大增

 

 

紅酒商大增

 

蘋果日報 2009年12月14日

 

餐飲 M在飲茶時份，嘆息生意難做，問佢點解，餐飲 M話：「未撤銷紅酒稅之前，入口紅酒嘅管制甚嚴，我引入一隻新酒，搞手續要成三個月，麻煩到極，故此冇乜人入呢行，我嘅生意幾穩陣。但係冇咗紅酒稅之後，禾雀亂飛，入口紅酒話都冇咁易，人人都可以做，於是幾間餐廳老闆都話有熟朋友入口咗一批酒，唔再問我攞貨，你話幾唔好呢！」

原來如此，即係話紅酒在完全自由市場狀況底下，「入場障礙」（ entry barrier）冇晒，競爭者大增，影響到既得利益集團嘅生意與利潤。對消費者嚟講，係好事啫，對老牌紅酒商嚟講，就有怨言嘞。左丁山係消費者，舉腳贊成取消紅酒稅，近日有朋友推介一隻智利紅酒（ 2007），售價只係六十元一瓶，當然唔係一流佳釀，但一定係「霎眼嬌」，絕對係「物有所值」，餐飲 M話：「就係呢啲平酒搶咗唔少生意啦！」

 

唔怪得紅酒生意大旺，防空洞酒窖一開張就宣告滿座，大集團爭住在工業大廈設置酒庫，連餐飲 M都承認，撤銷紅酒稅係近年最成功嘅公共政策，為香港創造不少新職位，催生咗一個紅酒行業。記得一個月前碰到 IT張，問佢呢排搞甚麼項目， IT張遞上新名片，已經變咗係紅酒張，乜轉型得咁快呀， IT張話：「香港地一定要識轉彎先至掂。 IT項目時有時無，我家做紅酒，靈活好多。」佢嘅大計就係訓練紅酒師，開班授徒，似足紅酒雞精班，話好受歡迎喎。 IT張嘅市場對象係中菜館嘅侍應領班、經理。一流西餐廳多數有專人負責飲品，介紹紅酒白酒、香檳。但中菜館呢？好少經理對此有認識。如果有人推介吃燒鵝配邊隻酒，吃清蒸東星斑飲乜嘢酒，諸如此類，一定可以促進餐酒生意，對菜館大大有利！

取消紅酒稅係曾俊華司長去年提出嘅，不出一年，立即超額完成預期效果。究其實，曾司長還是特首辦主任之時，不少人已不斷游說當時嘅財政司司長唐英年取消紅酒稅，但唐司長一直以自己藏有大量紅酒為理由，一於唔制，費事俾人話佢有利益衝突，話要等下任財爺去諗。此大計卒之由曾司長推出，造就香港成為亞洲紅酒中心。

 

（按：昨日言及中大示威之事，交稿後碰到一位中大人士，佢話在現場見唔到周校長，衝上台者有四人。）

 

（左丁山）